TEKNIKARIOK, ESK, LAB, UGT, ELA eta CCOO Euskal Autonomia Erkidegoko Ikuskizunen eta Ekitaldien lehen Hitzarmen Kolektiboaren negoziazio-mahaia osatzen duten sindikatuek, agerraldia egingo dute datorren ostiralean, maiatzaren 8an, 11:00etan, Bilboko Euskalduna Jauregiko zabalgunean, datorren maiatzaren 15erako greba-eguna iragartzeko. Mobilizazio honek ez du aurrekaririk, Euskadin arlo honetan –600 langile baino gehiago ditu sektoreak– egiten den lehen greba baita.
Erabakia 2024ko urtarrilean mahaia eratu zenetik bi urte eman ondoren hartu da. Sindikatuek salatu dute patronalak, EUKI elkarteak ordezkatuta, erabateko blokeoa ezarri duela, eta jarrera horrek langileen gutxieneko eskubideak bermatuko dituen lan-esparrurantz aurrera egitea eragozten duela.
Sindikatuek salatu dutenez, sektoreko enpresek jardueraren aldizkako izaera baliatu dute Langileen Estatutuan jada jasota dauden eskubideei muzin egiteko. Izan ere, 24 hilabeteko elkarrizketaren ostean, patronalaren «azken eskaintza» legeak ezarritakoaren azpitik dago.
Besteak beste, patronalak lan-ordutegiak eta txandak ezarri nahi ditu aurrerapen onartezinarekin, langileei beren bizitza pertsonala eta familiarra antolatzea eragozten dien etengabeko prestasuna eskatuz. Erabateko malgutasuna eskatzen da, inolako kontraprestaziorik gabe edo horrek dakarren nekagarritasuna aitortu gabe.
Maiatzaren 15eko grebaren atarian, sindikatuek lege-erasoaldia hasi dute dagoeneko, Lan Ikuskaritzan salaketak erregistratuz. Hala, blokeo egoeran araurik ez egotea aprobetxatuz, oinarrizko lan-araudia sistematikoki urratzen duten enpresen aurka egiten hasi dira.
Greba deialdia irmoa bada ere, TEKNIKARIOK, ESK, LAB, UGT, ELA eta CCOO sindikatuek elkarrizketarako borondateari eusten diote, baina patronalaren jarrera goitik behera aldatzen ez bada, elkarrizketei ez dietela berriro ekingo ohartarazi dute.
Ekitaldi eta ikuskizunen sektoreak, EAEn gero eta indartsuagoa, profesionalen erregularizazioaren aldeko borrokan mugarri izango den egunari aurre egin beharko dio.
Visitas: 7
