UGT Euskadiko Zerbitzu, Mugikortasun eta Kontsumo Federazioak (FeSMC) Euskotreneko hitzarmen kolektibo berrirako aurreakordioa sinatu du, garraio zerbitzu horren «hitzarmen kolektiborik onena lortzeko negoziaketetan, borondateak eta jarrerak hurbiltzen 18 hilabete eman ondoren».
Sindikatutik azpimarratu dutenez, aurreakordio honek «datozen urteetan Euskotrenen zabalkuntzari aurre egiteko oinarriak ezartzen ditu, langileen egonkortasun ekonomikoa eta hobekuntza sozialak bermatuz». Testuan jasotako aurrerapenen artean, soldatari dagozkionak nabarmentzen dira, hala nola karrera profesionalaren ezarpena; soldata-bermeak KPIaren igoeren aurrean; edo eguneratze ekonomikoak lanpostuen balorazioaren arabera; ekitaldi handietan lan egiteagatiko plusak edo gauekotasunerako igoerak, besteak beste. Orotara, igoerak 4.500€ ingurukoak izango dira 2028rako, indarraldiaren azken urterako alegia.
UGTk beste aurrerapen garrantzitsu batzuk ere azpimarratu nahi izan ditu, hala nola 57 urtetik gorakoentzako lanaldi-murrizketa, 61etik aurrera 120 ordura arteko murrizketa mailakatuarekin. Halaber, lizentziak eta kontziliazioa hobetzen dira, eta deskonexio digitala edo LGTBI+ lan eskubideak bermatzeko gaiak txertatu dira.
Lehen aldiz, hitzarmen kolektibo honek LPZ bat negoziatzeko aukera emango du, eta hori egiten denean, Euskotrenen enplegu publikoa lortzeko deialdietan, bai eta lanpostuak betetzeko, mugitzeko eta barne-sustapeneko prozesu guztietan ere, une bakoitzean indarrean dagoen euskararen normalizazioari eta erabilerari buruzko araubide juridikoa hartuko da kontuan. Sindikatuak, azkenik, alde guztien inplikazioa nabarmendu du aurreakordio horretara iritsi ahal izateko, Susana Garcia Chueca Eusko Jaurlaritzako Mugikortasun Iraunkorreko sailburua ere aipatuta.
Visitas: 11
